Na mañá do domingo 30 de xaneiro, As Encrobas foi escenario, un ano máis, dunha sentida homenaxe a Moncho Valcarce por parte da comunidade billardeira contribuíndo deste xeito a perpetuar a súa memoria como exemplo de entrega e compromiso coa xente. Máis de 40 palanadoras e palanadores dos equipos da Laracha, Paiosaco, Cerceda e A Coruña e tamén das Rías Baixas, Compostela e incluso das Canarias reuníronse en Pontoxo para xogar á billarda e compartir sentimentos, emocións, cultura, deporte e gastronomía nunha xornada organizada polo equipo local Cochiqueiros da Billarda en colaboración coa Federación Galega de Deporte Autóctono (FGDEPAU) e a A.C. Lucerna de Cerceda. No aspecto deportivo salientar o grande abano xeracional das participantes na xornada e destacar a alta participación de nenos, algúns dos cales debutaban xogando á billarda. A entrega de premios desenvolveuse a carón do busto de Moncho onde cunhas emotivas verbas se lembrou a súa figura, os valores que defendía e a súa entrega e compromiso na defensa dos dereitos das veciñas e veciños das Encrobas. A xornada rematou coma sempre cos presentes entoando a Cantiga das Encrobas.